尋日煲呔曾出席立法會答問大會，社民連三子唔知係咪收到風建制派要做嘢，所以改變策略，由武鬥改為文鬥，多次喺煲呔曾發言時插嘴搗亂，最後都係畀立法會主席趕晒離場。建制派會後就把握呢個機會，歷史性首次舉行聯合記者會，發表聯署聲明譴責社民連三子嘅行為，並對其他泛民喺前日會議上展示標語牌表示關注，要求立法會主席做番啲嘢。

36人唔齊心

其實份聯署聲明有兩部分，首部分係譴責社民連三子嘅粗暴行為，除身在海外嘅霍震霆，其餘三十五名建制派議員都簽咗名，可以話係史無前例嘅創舉。但第二部分質疑其他泛民舉牌抗議嘅聲明，就只有三十二人聯署，顯示建制派好難令三十六人對每件事達致統一意見。

正如專業會議嘅何鍾泰尋日同卿姐爭政制事務委員會副主席時，亦有兩名建制派委員「倒戈」投咗畀卿姐。其實若非有力人士喺背後發功，都幾難叫三十幾個建制派議員坐埋一齊做番啲嘢，你估大家係畀面煲呔曾咩！