尋日喺施政報告嘅答問大會上，林健鋒爭贏第一個提問，算係攞頭彩，一開波佢就大讚自己有份提出嘅活化工廈係方向正確，話呢個政策善用土地資源。不過佢自誇之餘仲不忘抽水，之後佢仲逐個字咁話：「有助增加經濟動力。」嘩！仲有冇Hard Sell（硬銷）啲呀！唔單止邀功，仲乘機幫自己個政團賣廣告，驚死冇人聽得出咩！

除咗林健鋒同大輝外，建仔同五散人都話有份喺活化工廈上畀意見，所以有呢個成果唔一定係林健鋒或經濟動力嘅功勞喎！林健鋒就解畫，喺施政報告度活化工廈分咗四大重點，其中一個係低息分期補地價，佢好肯定呢個係經濟動力原創，兼且從來冇其他人提出過。言下之意，即係話自己絕對唔係黐人哋金糠！

經濟動力呢排都好活躍，日前就為建制派飯局做搞手，尋日喺立法會大賣廣告，睇嚟佢哋都係想省下個政團嘅招牌啫！