歸根究柢，又係食物及衞生局局長周一鑊嘅錯！棄菜數量高企，原因是走私菜大量流入本港。業界多次批評政府監管不力，走私菜氾濫，搞到批發商冇啖好食！

原來內地自去年實行標籤制後，蔬菜只要有標籤，品質合格便可供港，但隨即衍生了「假產地、真標籤」的問題。不法分子向內地合格菜場購買標籤，再轉售無註冊菜場，導致大量走私菜輕易輸港。業界屢次投訴，政府卻一次又一次話搵唔到源頭！

日日咁走私都話搵唔到源頭，呃鬼食豆腐咩！坦白講，如果老公日日去偷情，你話個老婆知唔知啊？偶然一次偷腥，也許可以瞞天過海，但日日滾紅滾綠滾天光，盲嘅聾嘅啞嘅都Feel到啦！計筆者話，既然政府無能搵唔到源頭，不如請私家偵探去查，成籮成籮嘅走私菜冇理由查唔到！

業界指以前唔會賣剩咁多，如今最多試過一日賣剩一萬斤菜！食物銀行怒轟菜統處帶頭浪費，而食物銀行一直欠缺蔬菜捐助。周一鑊，唔該攞啲魄力出嚟，一洗唔敢食一粒熊仔餅嘅頹氣，大丈夫要雄飛奮起，不是雌伏苟安！當化身占士邦，盡快查出走私菜嘅源頭，豈能蒙一世污名！