日前港鐵試過喺十五小時內，兩段繁忙時間兩度發生列車故障，搞到乘客逼爆港鐵沿線各站月台。連串嘅列車事故總算大話夾好彩冇造成人命傷亡，但港鐵陷阱多多，一個唔好彩隨時中招。

話說港鐵近年為咗方便輪椅使用人士、推BB車以及帶大量行李嘅乘客，特別設置咗一啲用活板出入嘅闊閘機，點知「方便乘客」變成「靠害小童」，近年經常有活板夾親小朋友嘅個案，只不過港鐵一直秘而不宣之嘛。

呢嗱，有個細路女就慘咯，禍不單行，試過兩次被夾添，真係見過鬼都怕黑啦，搞到佢依家過親閘都心慌慌，要蓋住塊面衝過去至得。

弊在港鐵死唔認衰，話意外並唔係機件故障，反而話係家長喺閘機嘅另一面時，行得太過近閘機，所以啟動咗閘門嘅感應器；另外仲有一個可能性，就係因為小朋友太矮，令到閘機感應唔到有人。

叮佢個鎯鎯，呢啲都唔知係乜嘢道理，行得太近有罪呀，使唔使要夾人呀？況且本報記者親身去過曾經夾親人嘅大圍及沙田圍港鐵站測試，發現闊閘機嘅感應器穩定性認真麻麻，提示逾時過閘警號時快時慢，有啲慢到成分鐘至響，有啲快到七秒就響，大吉利是有孕婦行慢些少過唔切，後果可大可小呀！

再講，港鐵將責任賴喺小朋友嘅高度亦好無稽。按港鐵規定，三歲以上嘅小朋友必須買小童票過閘，但車站嘅長頸鹿度高尺只係標明過咗某個高度要買飛，從來冇見過話生得矮就要夾頭咁冷血㗎。如果港鐵夠膽寫到明，邊有家長肯畀自己個心肝寶貝較飛吖！

其實兩鐵合併之後，港鐵服務質素一日差過一日，好似話月台幕門咁吖，依家仲有唔少港鐵車站未裝上幕門，搞到耐唔耐就有人跌落路軌非死即傷。港鐵仍然一派你急佢唔急咁款，話要等到二○一二年至全部搞掂喎。

叮！唔知仲以為整緊太空穿梭機添，裝幾道幕門使唔使搞咁耐呀？連專家都話裝月台幕門根本唔係啲乜嘢高科技，頂多三個月就搞掂！大家千祈唔好唔記得，港鐵依家每程車費仲收緊興建幕門附加費呀。拖下一年，拖下又一年，嘩，賺息都賺到笑啦！

鬼咩，行政總裁周松崗曾經講到明佢係「屁股指揮腦袋」，要顧及股東利益。咁即係話，錢係大於一切，乘客安全？Sorry，並唔係佢顧及嘅範圍，真係抵叮到極！

之不過，港府作為港鐵嘅大股東，監管港鐵絕對係責無旁貸，呢啲係關乎人命安全，唔可以再劑劑用「商業決定」拍拍屁股唔理！再係咁，唔理「屁股指揮腦袋」抑或「腦袋指揮屁股」，一律都要叮爆佢！