范太話自知脾氣急躁，郁啲就板起面孔話人哋唔啱，後來明白到咁做會令身邊嘅人唔開心，於是努力糾正弊病，又話「今日仍未改得晒，仲有啲剩」。佢話，要向他人宣揚正念，首先要由自己做起，由心做起，時刻提醒自己「笑一笑，世界更美妙」。

之不過，當會後問佢關於白鴿黨立法會議員甘乃威涉嫌性騷擾女助理一事，佢話早前已回應晒嘞，唔想多講，希望件事交由白鴿黨同立法會按照佢哋嘅程序做事喎。

甘威就話唔想多講啫，但施政報告新鮮熱辣出爐喎！問佢會唔會重返立法會旁聽？佢即刻話：「我一介草民啫！唔使咁緊張。」

唔通佢懶理施政報告？咁又未必，正所謂不在其位，不謀其政，以前范太做立法會主席，每逢宣讀施政報告，佢都會坐鎮立法會，確保會議過程無誤，咁依家都轉咗莊啦，要緊張嗰個另有其人，又使乜佢操心同煩啫！