政府宣傳東亞運不力，直至近日傳出多名星級國手「欄王」劉翔同「跳水王后」郭晶晶等，都好有可能會來港作賽，先掀起一場遲嚟嘅撲飛潮，但原來好多項目喺開售冇耐已全部售罄，有啲政界名人就奇招盡出撲飛。
霍震霆日前就呻話好多政界名人以為佢做得港協暨奧委會會長，一定收埋成箱東亞運門券，個個急起上嚟都問佢攞飛，但係佢每次都只能伸隻手落衫袋，然後再攞番五隻手指出嚟，以示佢真係冇飛派。佢又話除咗跳水及跨欄等有星級國手參賽嘅項目，統稱體育舞蹈嘅十二項標準舞同拉丁舞賽事，門券亦晨早賣斷市，好多熱愛跳舞嘅闊太名媛都有搵佢幫手，佢都愛莫能助。
香港體育舞蹈聯會會長洪祖杭話香港的確有好多愛舞之人，體育舞蹈係其中一個最早賣斷飛嘅項目，連佢都冇多餘門券分畀人。