其實所謂「搞局」即係建制派喺施政報告搞飯局啫，呢次唔係佢哋第一次出嚟食飯，七月尾上屆立法會會期完結時，建仔都做過搞手約食飯，但當時就揀到唔好日子，撞啱唔少議員要參加人大代表團去山西考察，搞到只得二十五個人出席飯局，明顯出師不利。

九月各議員放緊暑假時，建制派又諗住翻兜豪華版泛民飯盒會，點知呢次擇日擇得仲差，班議員旅行嘅旅行，出trip嘅出trip，三十六個人當堂變咗一盤散沙。要結合建仔、工聯會、專業會議（4P）、經濟動力（4L）、五散人同詹Sir二人組呢七個組合，真係仲難過秦始皇統一六國；所以唔使講都知，呢次嘅飯局又流咗產。

搵4L做統籌

吸取咗前兩次失敗經驗，今次建制派搵嚟4L做統籌，再次結合各個議員今晚喺中環上海總會食飯；4L話依家已經有大約三十人應承出席飯局，反應唔錯。4L話今日個個議員都會喺香港聽施政報告，相信今次會搞得好成功。其實，佢哋約埋食餐飯聯誼吓，都係希望可以「團結軍心」，等第日箍票都易啲啫！

呢次擇日，建制派嘅選擇睇落好聰明，但睇睇《通勝》，赫然發現佢哋真係聰明得滯！今日係舊曆八月廿六，唔單止係破日，仲忌乜呢？《通勝》話今日諸事不宜，宴會設壇樣樣都係忌諱。

咁即係話，煲呔曾施政報告開壇，同建制派嘅豪華版飯盒會，都未必有好結果，甚至係當黑添，估唔到佢哋會衰埋一堆喎！

有忌當然有宜啦，《通勝》話有兩樣嘢係適宜做，其一係移祖先，其二係拆屋；所以煲呔曾睇嚟都唔可以開心住，分分鐘泛民今日拆佢台會拆得好順利！煲呔曾睇路嘞。