小白觀點：要將人渣倒落「舂臼地獄」

嘩！場面認真悲壯呀！睇本報日前頭條嘅新聞圖片，菜山菜海，一望無際，小白老弟仲懶叻咁話，圖片右下角九成九括住「設計圖片」啦，唔使講一定係CG所為，點知搵極都唔見，原來咁震撼嘅場面，竟然係蔬菜統營處所為！為咗保障佢哋嘅佣金利益，賣唔晒嘅菜每日成噸成噸咁倒。

不過浪費食物已經係潮流，睇見嗰啲垃圾廚房電視節目就把火，玩弄女性就梗啦，將珍貴嘅食物都糟蹋就勢係假，仲有呀，美少女想瘦到死係佢哋嘅事，唔好整到成枱都係餸，每碟夾一箸仲要走去廁所扣喉，真係折墮！將呢啲人當係殘渣剩飯，傾倒晒佢哋落去「舂臼地獄」受苦就啱嘞。

網友觀點...X）...

[　simple OL　]

咪就係因為咁，所以啲菜愈嚟愈貴囉！

[　ka Ming　]

太過分，好學唔學，學埋人哋外國倒食物、倒奶，乜都係利字當頭！

[　小小so　]

佛教有講「共業」，菜統處做落嘅業，可能有日要全港市民受都未定。

[　mk　]

有人冇菜食，有菜冇人食，折墮呀！

網址：www.sunsiupak.blogspot.com

阿豪觀點：菜統處為保佣金冇陰功

開講有話：「食得唔好嘥。」點知依家本港每日有成一噸新鮮菜被棄置。菜統處為咗保障自己中介服務佣金利益，寧願將每日賣剩嘅新鮮菜扔掉，你話係咪冇陰功呀？

打開報紙一睇，幅相真係好鬼震撼：一片綠油油嘅海洋，唔知仲以為係當局繳獲咗一大批有毒蔬菜，收集晒喺度，就好似內地將大批盜版光碟堆埋一齊，然後用壓路機壓碎晒，畀傳媒錄影嗰種大陣仗。

咁就慘啦，盜版光碟害人害物，點同食菜咁有益健康呀。不過咁都好嘅，你知啦，最近大學做咗個研究，話發現好多肉類都可能含抗藥性大腸桿菌，搞到市民都唔知去邊度搵安全食物。依家唔使驚啦，去菜統處「蔬菜堆填區」啦，包你食到放心菜呀！

網友觀點...X）...

[　working class hero　]

咁即係損人不利己啫……做少少善事，唔係真係咁難為佢哋呀？

[　Sue　]

有冇搞錯！政府又話帶頭搞環保，呢頭又不斷浪費食物，捐畀慈善團體，或者食物銀行都唔係好麻煩啫，總好過日日咁掉，真係太浪費啦！

[　費曼　]

要求班官體恤民間疾苦，都係慳番啖氣暖肚好過啦！

[　卜勤王　]

一係就畀晒鮮魚行學校，益吓窮學生。一係就開間鮮菜行學校，教吓有錢官員珍惜食物。

網址：www.lukchiho.blogspot.com