問題係，安老院舍服務參差，香港醫護學會今年九月進行一項「本地安老院舍服務」意見調查顯示，八成市民對於晚年要入住安老院態度負面，當中超過四成受訪者認為本地安老院舍服務質素差，五成人唔認為安老院係可以安享晚年嘅地方。

冇錯，雖然絕大多數嘅長者服務機構都好重視服務質素，但多得社會福利署冇好好監管，令到樹大有枯枝，有部分院舍環境麻麻都算嘞，竟然離譜到連藥都可以派錯。根據社署資料顯示，○六至○八年間接獲一百宗懷疑安老院不當處理藥物個案，問你怕未？難怪咁多人談安老院色變啦。

不過，先撇開質素唔講，有時公公婆婆入到安老院都算係咁咯，知唔知有幾多老人家冇咁好福氣，等到死都未等到入住安老院？呢，唔係勞工及福利局局長張建宗親口講都唔知，去年共有二千五百五十六名長者等唔切，喺輪候期間去世。

叮佢個鎯鎯，老人問題唔係今日至出現，根據政府統計處資料顯示，預計喺二○三三年，每四個人當中就有一個係長者，完全可以想像將來對安老院嘅需求會大增。弊在當局施政一味只係識得唱高調，之但係安老服務就幾乎交白卷，老人家想靠佢老有所依，真係唔使旨意。

單係計政府資助老人護養院嘅輪候時間，閒閒地超過三年，平均要等三年半至有宿位，當局完全冇正視過問題，又係用番嗰招拖字訣，最快要到二○一一年至增加六百五十個宿位咁大把咋！

難怪家陣隱蔽長者問題愈來愈嚴重，有調查發現本港隱蔽長者可能多達九萬人。冇計啦，公公婆婆到咗風燭殘年時，諗住可以安享晚年，殊不知撞正一個咁涼薄嘅政府鬥長命，連僅有嘅一啲尊嚴都冇埋，唔玩自我隱蔽都唔得啦。

話時話，可能有公公婆婆對曾蔭權嗰份施政報告仲有一絲幻想，計太一叮話齋，真係諗都唔使諗呀！你知啦，特區政府向來都親疏有別，用多多公帑請副局長、政治助理眼都唔眨，之不過，一講到要用喺長者身上，就牙痛咁聲。

前車可鑑，長者醫療券得雞碎咁多錢，公公婆婆隨時人出豉油佢出雞，貼錢睇醫生；想話增加些少生果金啫，曾蔭權都仲要話引入資產審查，當堂畀佢激到啤一聲。

太一叮奉勸一句，喺官僚眼中嘅「家有一老」只不過係「如有一草」，所以老人家唔好有太多不切實際嘅期望，無謂激親自己影響健康吖。