好多波牛捱更抵夜都要睇波，過幾年香港可能有機會舉辦世界盃呢！之不過，呢個係非一般嘅世界盃，因為係無家者世界盃。本身係青年事務委員會主席嘅和富社會企業會長李宗德，尋日話正積極爭取二○一四年搞呢個盃賽，以提升港人對無家者嘅關注喎！
雖然李宗德同時係和富大埔嘅班主，亦唔踢波，但好相信運動可團結社區，所以由佢牽頭嘅和富社企由○五年起資助香港社區組織協會，組織無家者足球隊出外參加無家者世界盃，等佢哋得到團隊嘅溫暖，融入社會。
但要搞無家者世界盃，錢係最首要嘅問題。之前和富資助無家者參加世界盃只要十零二十萬，但若香港做主辦城市，估計要成千萬元，搵唔到資助就更頭痕。另外就係政策問題，如果香港申辦成功，各國會有數以千計嘅無家者嚟香港，呢班參加者通常係無業人士，李宗德擔心入境處會唔批佢哋入境。
嘩！乜講到好似路路不通，塞晒咁o架！睇怕李宗德都要加把勁同政府斡旋，通番晒啲血管同經脈至得喇！