立法會內務委員會早前通過由內會主席劉健儀，就白鴿黨議員甘乃威涉嫌性騷擾女助理事件提出彈劾動議，稍後會成立七人調查委員會跟進。根據有關嘅國際準則，調查委員會應由女性佔多數，即係最少有四名女議員參與。表面上睇，今屆有成十一名女議員理應足夠有餘，但礙於部分女將唔會參與調查，令問題變得複雜化。
例如甘威嘅黨友劉慧卿，一早講明會避嫌唔參與調查。根據《議事規則》，提出彈劾動議嘅議員亦唔可以加入調查委員會，即係又少咗劉健儀。有議員又認為與甘威同區嘅議員亦應避嫌，當堂又冇咗四個女議員。最後剩番吳靄儀、梁劉柔芬、李鳳英、李慧琼同梁美芬五揀四。據聞部分人仲好唔想沾手今次事件，認真惡搞。
有指委員會一方面要以女性佔多數，但另方面亦要有一定數目嘅男議員，以平衡兩性間對性騷擾問題嘅尺度同觀點。根據呢個原則，曾講過「十個女人十個係雞」嘅詹培忠、爆出過巴黎爆房疑雲嘅李國寶，同涉越洋向青島美少女「孔雀開屏」嘅謝偉俊，都係調查委員會嘅不二之選。