佢憶述當年去過境口岸親身視察，見盡「偉大父親」一早幫仔女孭書包湊返學嘅情景，搞到佢好感慨，於是拿拿臨同當時嘅教統局常秘傾喺深圳設立港式學校，為港人內地子女提供免費教育。點知對方當時以一句「福利不可為」回絕，仲反問如果為港人內地子女提供免費教育，第時加拿大、澳洲嘅港人子女又話要免費教育點算？

講番呢件事，佢仲好勞嘈，之後意有所指咁講：「呢個常秘依家做緊人大，反而成日講點樣喺深圳起學校，教育下一代。」棠哥冇講明呢位昔日嘅常秘、今日嘅人大代表係邊位，但相信大家都估到啦。