巴西里約熱內盧申奧成功，背後有邊啲國際奧委會委員投佢票一直成謎。雖然賽果「米已成飯」，但手握投票大權嘅國際奧委會委員霍震霆尋日出席一個活動時，就點都唔肯講投咗票畀邊個國家，一味話巴西勝出「係集體嘅選擇」。
但講起各國元首拉票戰況，霍公子就滔滔不絕。話說佢喺北京出席建國六十周年慶典期間，突然收到美國一位高層政要致電游說，令佢好驚訝。去到哥本哈根就更誇張，西班牙國王卡洛斯同國際奧委會終身榮譽主席薩馬蘭奇車輪戰上前拉票，叫佢投西班牙神聖一票；「萬世球王」比利亦走近搭實佢膊頭打招呼，唔使問都知，梗係叫佢投巴西啦。
正所謂盛情難卻，到底佢投畀邊個呢？都話唔講咯，但佢對巴西申奧成功非常受落，擺出鬼馬表情，話要學定森巴舞湊熱鬧喎。