專業會議嘅立法會議員梁美芬因喺《家暴條例》修訂上，大力反對將同性同居關係等同異性婚姻關係處理，成為唔少同志嘅眼中釘。政府其後讓步將同居同婚姻分開處理，佢又堅持只可以包括兩名伴侶嘅同居關係，反對保障埋多過兩個伴侶嘅同居關係，畀一名玩開「3P」嘅男同志，公開送咗套男士貞操帶畀佢，諷刺佢對性嘅立場過分保守。
但佢並唔覺得呢件事好醜怪，尋日仲好自豪咁帶埋套貞操帶嚟畀記者影相，話事件證明佢立場堅定同EQ高，定會珍藏呢份禮物，點都唔會送畀人。
講到來年工作，佢自爆好享受「4P」嘅合作關係。大家唔好諗歪，佢講緊嘅「4P」，其實係佢所屬嘅「Professionals Forum」嘅簡稱。佢話其餘三「P」分別嚟自唔同界別，幫佢啲地區選民解決咗好多工程、建築同房屋問題，同政府拗起數上嚟亦特別有Say喎！