尋日一個活動委任咗五位傑出運動員擔任東亞運大使，包括「風之后」李麗珊。身為兩女之母嘅珊珊決定唔參加東亞運，就連二○一二年倫敦奧運都放棄喎。犧牲咁大，皆因佢發覺兩個囡囡運動天分甚高，四歲大女已識得徒手潛水執貝殼，嚟緊又會參加泳會游泳賽，仲玩埋風帆，絕對係體壇明日之星；兩歲細女亦曉游水，湊女令佢好有滿足感。
珊珊呢次純粹以觀眾嘅角度去欣賞東亞運賽事，除咗佢拿手嘅風帆外，最想睇劉翔跨欄。佢話由於劉翔因傷患退出北京奧運，起跌波幅好大，所以好想睇劉翔嘅風采。不過佢都知道田徑項目嘅飛好搶手，所以佢都要搵辦法去撲飛喎！
