泛民尋日開飯盒會商討玩嘢大計，會後人人一致封口，唔肯講究竟預備咗乜嘢招數、幾時出招等，只係話如果施政報告真係冇講政改嘅話，泛民就會有集體行動。有議員仲話，「卿姐」劉慧卿喺會上仲「落柯打」，千祈唔可以同傳媒透露佢哋嘅招數，否則就要「斬頭」，總之要大家聽日到時睇啦！

唔預有糖派 唔觸及政改

其實唔需要等聽日，都可以預計新一份施政報告唔會有糖派、唔會觸及具爭議嘅政改問題，重點只係發展六大產業。換言之，泛民主派收貨可能性唔大，問題只係究竟佢哋有乜花臣。

但聽聞泛民之所以唔能夠對外講有乜嘢招數，暗啞抵其實係佢哋冇貨可交，好似集體離場、舉紙牌呢啲了無新意嘅方法都有傾過，但係大家未有共識點搞，所以聽日朝早宣讀施政報告前，泛民要開多一次會仔細研究。

嗱！都話泛民表面團結，內裏係一盤散沙㗎啦，講到好似來勢洶洶咁集體行動兇煲呔曾，原來未拗掂數，睇怕到時好似《國產凌凌漆》裏面嘅「聞西」咁，以為「攞你命三千」好有殺傷力，到頭來兇煲呔唔到，反而得啖笑，嗰時泛民就真係丟人現眼喇！

所以聽日泛民有心玩嘢嘅話，必須出奇先可以制勝，鍾意斯文嘅可以將寫滿訴求嘅氣球喺議事廳入面放上天，氣球多嘅話，場面都幾壯觀㗎；鍾意激進嘅大可全程對住煲呔曾整鬼臉以示不滿，咁樣煲呔曾奈你唔何之餘，又唔會趕你出議事廳，都算係兩全其美。