小白觀點：貪大吉利是咩

救護車服務差到冇朋友，當局賴天賴地賴唔到，竟然賴落十萬火急call白車嘅小市民度。其實邊有人咁得閒將白車當的士o架，貪大吉利是咩！小白老弟識得幾個巴士迷，成日「哺」喺巴士站影巴士，但至今都好似未見過有一個白車迷，一見架白車就識得講：「呢架咪係尋日喺彌敦道跪低、三日前喺街口踢極唔郁嗰部囉！」

如果真係要令市民迷上白車，唔該畀多啲錢執好隊車啦！架架配備V12引擎，0至100加速唔使幾秒鐘，鋁合金外表實而不華……如果消防處真係有一隊咁牛嘅車隊，來屆嘅澳門格蘭披治大賽，不如新增一個「白車賽」，睇吓香港救護員車手點掟入髮夾彎都好吖。

網友觀點......

的士阿叔

救護車服務咁差，咪變相令的士生意好咗囉，消防處為咗班的士司機大佬真係用心良苦。

婷婷

救護車成日死火，有急事真係情願搭的士去醫院好過。

憤怒

政府連咁嘅錢都慳，納稅人交咁多稅，拎晒去養班蠢人懶人，社會建設就冇樣得，真激氣！

貓咪

油麻地、旺角有人需要，喺香港嗰邊調過嚟，好驚訝囉！唔夠白車就入多啲啦，人命嚟o架！

網址：www.sunsiupak.blogspot.com

阿豪觀點：市民慘被抹黑

消防處早前抽查召喚白車個案，發現當中只有一成屬非緊急個案，同保安局之前話五成係非緊急個案，差天共地喎，咁究竟市民應該信邊個先？市民慘被抹黑，又可唔可以好似台灣食肆告「網上食神」咁，告特區政府誹謗呢？

點都好啦，一樣米養百樣人，部分市民濫用白車在所難免，但代唔代表可以整個乜鬼嘢「白車召喚分級制」出嚟，搞到有需要人士好似要考試合格後至可以坐到白車去醫院咁？

其實電影都一樣有三級制啦，又唔見戲院盤問所有入場睇三級片嘅觀眾？頂多只係開場前警告吓啫！有人濫用白車，你咪重罰佢哋，收番成本價囉！

網友觀點......

黎安

救人爭分奪秒，分乜鬼嘢級呀？真係發現濫用嘅，罰佢哋錢仲好過啦！

Johnson Lo

上得白車，都要架車順順利利去到醫院，唔好中途死火至得……

卜勤

救到十個人，畀一個人呃，又何妨。最緊要救人，其次先係預防畀人呃。

Patrick Lai

八號風球仲出海游水衝浪，又或者行山太攰嗰啲友仔，都一樣係濫用救護資源，好乞人憎！

網址：www.lukchiho.blogspot.com