冇錯，香港地大把富豪，餐餐魚翅撈飯亦大有人在，之但係香港嘅堅尼系數高達零點五三三，係亞洲區貧富懸殊最嚴重嘅地區，好多赤貧家庭一日三餐都成問題，靠食物銀行免費食糧過日子㗎咋。

弊在呢個世界好唔公平，有人冇嘢食，有嘢冇人食，浪費食物呢啲折墮嘢無時無刻都發生緊。呢嗱，為蔬菜批發商以及買家提供交易設施嘅蔬菜統營處竟然帶頭浪費，每日毫不手軟將賣剩嘅蔬菜，成噸成噸當垃圾傾倒！

一日都係當局中門大開任由走私菜長驅直入，即使蔬菜市場銷量降低，批發商為咗遷就運輸成本，點都要頂硬上訂一定數目嘅蔬菜，結果搞到每日大量賣剩菜。呢啲菜又唔係爛又唔係生蟲，食得唔好嘥，可以捐畀食物銀行或其他慈善機構，唔使浪費食物之餘，又可以做吓善事，何樂而不為吖。

蔬菜統營處話就話會聯絡食物銀行收菜，亦好歡迎慈善機構拎菜，問題係，蔬菜統營處既冇宣傳，又冇主動通知慈善機構，受惠嘅慈善機構，都係得十幾間。○八年一月至十月初捐去慈善機構嘅蔬菜得嗰八千籮，大約二十四萬斤咁大把，佔咗總數唔夠兩成。

咁其餘嗰啲又點處理？真係唔講猶自可，一講把幾火！原來蔬菜統營處有權決定點樣處理剩番嘅蔬菜，唔理批發商每日賣剩幾多蔬菜，都要全數交晒畀蔬菜統營處處理。所謂處理，就係將新鮮蔬菜當垃圾散到一地都係，再搵垃圾車運去西九龍廢物轉運站。

據資料顯示，過去兩年，蔬菜統營處每日傾倒超過一噸新鮮蔬菜，呢個數量足夠二千個家庭享用，認真得人驚。有菜商覺得實在太浪費，諗住自己派架貨車幫手將賣剩嘅菜運去食物銀行，蔬菜統營處都一口拒絕。

叮！蔬菜統營處以小人之心度君子之腹，話唔畀批發商自己送菜去志願機構，係為咗防止有人把口話拎去食物銀行，實則拎咗去賣。叮！明白，原來都係因為利字掛帥，為咗要保障中介服務佣金，不惜將蔬菜當垃圾，實在折墮到極。

冇錯，蔬菜統營處係財政獨立嘅法定非牟利機構，要自負盈虧運作，收入靠晒中介服務嘅佣金，都唔好咁樣暴殄天物吖，負責監管嘅漁農自然護理署更加係責無旁貸。其實蔬菜統營處只要妥善監管剩菜運去邊以及主動向慈善機構宣傳，已經唔使咁浪費啦。

中國民間傳說中有十八層地獄嘅講法，當中有個叫「舂臼地獄」，相傳成日浪費食物，死後就會被打入舂臼地獄受苦。蔬菜統營處日日做埋咁多陰騭嘢，因住遲早有報應呀！