政商界名人雲集嘅華仁戲劇社，會喺呢個月尾踏台板上演一場英文大戲《鴉雀如何作鳳凰》。除舊生兼馬會主席阿John陳祖澤擔大旗飾演主角外，就連非華仁舊生嘅合和主席「哥頓」胡應湘太太亦粉墨登場，佢笑言老公同囝囝胡文新都係華仁舊生，可惜兩仔爺怕羞到極，逼住佢出嚟獻醜喎。
一眾演員已秘密練兵半年，尋日又齊集華仁禮堂排演，哥頓太邊唱邊拂水袖，功架十足。佢自爆只向粵劇大老倌謝雪心偷過幾次師，但為咗慈善，過去亦曾數次參與華仁英文大戲演出，佢今次飾演春秋戰國時代嘅越國公主，同飾演吳王嘅阿John有唔少對手戲。
講起演出心得，阿John話出台前只食六成飽，否則運唔到丹田氣；哥頓太就話要少講嘢養神同養聲。賭王何鴻燊去年亦有參與華仁嘅大戲表演，不過今年抱恙，未知嚟唔嚟到睇表演。