掹衫尾去匹茲堡懶巴閉

鬍鬚曾喺網誌尾段，特別花一段文字寫佢喺匹茲堡住嘅酒店點招呼佢。除咗話酒店保安嚴謹、成日有工作人員喺走廊行嚟行去之外，仲特別提到自己同副總理、人民銀行行長同其他主要官員都係住埋同一層，就連食飯方面都有專人照顧，幫佢哋安排中菜，話佢同一班領導人都食得好開心添！

其實，酒店好招呼係好正常嘅事，但鬍鬚曾咁強調自己同其他領導人一樣，就值得斟酌斟酌嘞！

其實，佢已經唔係第一次公開表示自己能夠同國家領導人享有同樣待遇，舊年開G20峰會時佢都寫過相同內容，即係代表呢件唔係新事。咁點解寫完又寫？大家就要自己解讀嘞！

之不過，鬍鬚曾要記住佢只係掹中央衫尾先有機會參加呢個高峰會，佢咁刻意同張揚要話畀外界知，佢同國家領導級官員同一層樓住，係咪反射作用，話自己同班領導人嘅級數「同呢」？雖然碗仔翅同魚翅都叫做翅，但鬍鬚曾明明係粉絲，就咪充魚翅啦！級數真係差天共地㗎！

鬍鬚曾除咗表現自己嘅「分量」之外，亦再次借網誌重申自己嘅工作能力。佢心臟病發後，外間人人都話可能同佢成日做跑腿有關。佢尋日就話，一早就慣晒做空中飛人，仲數番幾年前香港搞世貿部長級會議時，要「僕僕風塵」咁以大會主席身份不停周圍飛去拜訪唔同國家嘅領導，一年有三分二時間唔喺香港，即係否認自己係因為舟車勞頓而心臟病發，仲間接同大家講佢好能捱添！