小白觀點 研究人類鑊化不遺餘力

矇查查嘅高錕攞諾貝爾，奧巴馬又矇查查攞諾貝爾，依家冇番一個諾貝爾傍身，點出嚟行呀？特別係特區政府問責班子，為咗增加管治威信，係時候提名番個高官出嚟，睇吓可唔可以呃個獎返嚟都好吖。

小白老弟認為以周一嶽最有機會攞獎，醫學獎佢當之無愧啦，但佢攞獎嘅原因並唔係喺醫療失誤上貢獻良多，而係佢有名你叫「周一鑊」，長年從事「人類鑊化」研究，成功發現人類攝取大劑量嘅鑊化物質，會令皮層加厚，唔單止面皮加厚，背脊抗箭力仲特強添！

問題係諾貝爾委員會未必會賣帳隨便頒獎畀佢，嘿，特區政府大把錢，一於自己搞個Bowtie Prize分豬肉啦。

網友觀點...X）...

[　沉下了的落花　]佢梗係應該攞番個諾貝爾靠害獎啦，點解？靠害最叻囉。

[　風花雪月　]haaa，我都支持樓上嗰位嘅講法，靠害獎唔係佢攞仲有邊個吖？

[　Jun　]周一嶽攞呢個獎就實至名歸喇，成為全球首個靠害之父，成功將香港嘅臭名遠播。

[　Popeye　]周一嶽周身刀張張利，所以諾貝爾乜乜靠害獎、失誤獎、卸膊獎，好有把握攞晒。

網址：www.sunsiupak.blogspot.com

阿豪觀點 咁都未暴動維和有心得

奧巴馬獲得諾貝爾和平獎，世界會唔會和平就唔知，但分析家嘅眼鏡跌到周圍都係，眼鏡製造商呢鋪發囉！

真奇怪，今次和平獎人選公布後，各界唔係第一時間恭賀得主，而係幫諾貝爾委員會搵個合理解釋出嚟。既然係咁，我哋周一鑊都可以攞諾貝爾和平獎啦！冇聽錯呀，係和平獎而唔係醫學獎呀。大家諗吓，公立醫院幾乎日日打錯針輸錯血，香港都冇暴動，如果周一鑊肯公布有乜法寶令到港人咁溫順，和平獎實係佢攞硬啦！

有人話喎，頒個和平獎畀奧巴馬，係鼓勵佢往後幾年做得好啲。嘩，如果咁都講得通，咁我哋成個特衰政府管治得咁差，咪仲需要「鼓勵」？

網友觀點...X）...

[　木廁毛　]唔係喎，周一鑊邊有理由攞任何諾貝爾獎呀？嫌香港人口過盛呀？

[　摩根　]奧巴馬衝破種族界限，成為第一個黑人總統，本身已經值得攞和平獎啦！

[　Obaba　]奧巴馬都可以攞諾貝爾和平獎，真係乜都有可能，周一嶽話唔定可以做美國總統添。

[　小新　]周一嶽周身都係鑊，竟然拎埋荷蘭水蓋，真係天冇眼。

網址：www.lukchiho.blogspot.com