環境局局長邱騰華尋日出嚟吹水，話政府已經有措施鼓勵使用比較清潔嘅能源發電，又話用四億五千萬元幫私人大廈更換節能裝置，仲會推動電動車達到減排目標，講到天花龍鳳，藍天即刻返番嚟咁。

叮佢個鎯鎯，邱騰華出晒名吹水唔抹嘴，講來講去三幅被。正如當局早前拋出嘅十九招改善空氣質素建議，講就天下無敵，當中好多十畫未有一撇，落實嘅時間表又未有，完全得個噏字！

事實上，港府搞環保只有一道板斧，就係一味靠嚇。邱騰華講到明要提升本港空氣質素唔係話唔得，但係就恐嚇定小市民，電費可能加兩成！巴士票價可能加一成半！

有冇搞錯呀，環保人人有責，唔通電力公司同巴士公司冇責任推行更多嘅節能減排方法咩？唔通政府冇責任推出更多法規加強管制污染咩？點解下下將責任轉嫁畀市民？

查實港府呢招認真絕，四両撥千斤將個環保燙手山芋掟番畀小市民。即係話，你哋一係乖乖畀錢，如果唔肯畀錢就唔好再咁多聲氣怪責政府環保不力。

問題係，如果只係畀錢就得，咁使鬼要邱騰華搞環保咩，最怕係錢就畀咗，但維港上空依然咁灰，咁咪冤哉枉也？

以膠袋稅為例吖，收咗嘅錢原來並唔係用嚟推動環保，而係入咗庫房袋袋平安。最離譜嘅係，有團體踢爆膠袋稅實施咗幾個月，膠袋冇錯係用少咗，但搞到成屋堆滿晒不織布袋，呢種不織布袋仲難分解，反而仲唔環保。

此外，邱騰華近排狂谷電動車亦夠晒搞笑，乜鬼配套都冇，車價貴到嘔，又唔知去邊度搵插頭充電。好嘞，就算咁好彩畀你搵到，喂，電由邊度嚟㗎？咪又係發電廠，發電廠出名係主要嘅排污源頭，咪一樣唔環保。

仲有呀，早前國際無車日，明知成班高官整色整水搭公共交通工具都係做騷㗎嘞，但唔該交足戲吖。叮，政務司司長唐英年一於冇你咁好氣，做一半唔做一半，搭的士去政府總部，開完會後大模廝樣坐番上自己架座駕走人，環保？睬你都傻！

本港空氣質素差過乜，污染指數長期爆晒燈，有環保團體日前帶埋花牌遊行抗議，仲準備下個月帶埋BB上街。太一叮奉勸一句，上街唔係話唔得，但為咗身體健康着想，盡量少去政府總部附近。

你知啦，成班高官呢頭叫人做白老鼠用電動車，但嗰頭自己部座駕全部係食油怪，引擎容量三千至五千cc都有，死氣零舍勁。將來如果有幸落實十九項減排措施，據說平均壽命長一個月咁大把，之但係吸吸埋埋高官座駕嘅死氣，因住命都短幾年呀！