白姐姐形容女事主「真人靚過影相」，「雙眼水汪汪好似識講嘢咁」，但最後都冇請到，純粹係因為另一位應徵者嘅經驗同年資都高啲，同外貌完全冇關。

對於甘威辯稱「表示好感」唔等於「示愛」，白姐姐話如果男子一向處事認真、好少講笑、感情抑壓得多成日發脾氣鬧人，咁佢單對單向女人表白「有好感」已係好強烈嘅示愛。咁阿Paul係邊一類人？佢話：「佢其實都好抑壓，如果佢向人表示有好感，肯定有問題嘞！」

白姐姐又話如果事發後甘威有打畀佢「盡訴心中情」，就會教精對方點樣拆彈。佢話如果佢係甘威，就會承認係一時把持不住，但表白完已知衰縮沙，之後更發現再同女事主一齊工作，遲早又會行差踏錯，於是寧願賠錢都要即炒女事主，咁講法相信大部分香港人、包括啲師奶選民都會接受。但依家甘威連少少衰都唔肯認，又前言不對後語，就演變為誠信問題。

佢估計甘威最後都唔使辭職，但三年後想選番就有啲難度，又話如果甘威當初選唔入立法會，就唔會發生咁嘅事，真係「禍由福而起」。