汪阿姐尋日拉埋八和一眾副主席及理事亮相，大談香港如何食住申遺成功個勢，大力推動粵劇發展。佢滿腹大計，話想建立一所以粵劇為重點課程嘅中學，盡早發掘有潛質嘅粵劇新秀，因為粵劇界已出現青黃不接現象，就算演藝學院有訓練粵劇系學生，都因缺乏演出機會，功架難登大台。

相比之下，內地政府推動粵劇就不遺餘力得多。阿姐話，喺粵劇發源地嘅佛山，已經有大劇院、粵劇博物館及設立粵劇學校，一條龍培訓粵劇接班人，睇番香港，雖然政府設立粵劇發展基金撥出兩千萬推動粵劇，但筆錢同撥畀香港管弦樂團嗰七千萬相比，一睇就知政府仍然係「重西輕中」。

嗱！呢啲就係汪阿姐本色，唔會畀勝利沖昏頭腦，仲擺明車馬鬧政府放水大細超啦！外國人當粵劇係寶，香港人就將寶物當成草，難怪阿姐咁興囉。