Mandy早前退出公文袋，咁啱尋日喺中環見到公文袋黨魁余若薇，問余若薇點睇白鴿黨甘乃威「示愛」事件，佢表現得吞吞吐吐，明顯唔想多講，淨係話事件除咗影響甘乃威同白鴿黨，亦可能對香港嘅民主進程造成影響。但當問及Mandy爆料事件，余若薇呢個前黨友就如釋重負咁話佢已經唔係公文袋黨員喇！睇嚟佢都好慶幸Mandy早前自行退黨，否則今次單嘢分分鐘會燒到去公文袋身上。

波波自爆同佢唔熟

至於喺舊年選舉捲土重來擊敗咗Mandy嘅「波波」陳茂波，就話其實佢同Mandy唔係好熟，唔想對事件講太多。吓！前對手都唔熟？擺明係唔想同Mandy扯上任何關係。不過，波波同時又話未經授權披露性侵犯受害人嘅資料，表面睇當然唔係好啱。問佢平日有冇讚吓啲女助理，佢話佢啲助理做得咁好，當然成日都有讚吓對方喇，不過呢啲都係正常賓主關係，絕對唔會涉及其他嘢。

無論係前黨友或前對手都同Mandy劃清界線，唔單止冇晒朋友，仲搞到佢好似生人勿近咁，睇嚟都冇乜人會同佢傾偈嘞，更何況係密偈，事關點知幾時佢又爆晒啲料出嚟呀？

咁啱尋日又撞到出名大口嘅白鴿黨議員「肥仔明」李華明，問佢「表示好感」算唔算係「示愛」，佢就好罕有咁僅以微笑作為回應。問佢當年點同太太表白，佢就話只係講咗一句「同你一齊好開心」，連「有好感」都冇講，但佢強調呢個係三十年前嘅標準，當年啲人講嘢好含蓄，分分鐘結埋婚都唔會同對方講「我愛你」、「鍾意你」，同依家嘅標準好唔同，絕對唔係有意寸甘乃威喎！