小白觀點 大學生變咗「天之債仔」

唔好以為大學生係天之驕子呀，查實依家啲後生仔，唔理佢入學時係讀文史哲抑或係讀物理、化學，大部分都係主修吃喝玩樂、副修炒股賭波，畢業變失業，借落大筆學生貸款冇錢還，又欠落大堆街數，有啲仲搞到破產添，應該改名叫「天之債仔」至啱。

冇錯，依家嘅大學學費貴得實在唔成比例，咁多間院校，數數埋埋得一個前大學校長有世界認可嘅學術金漆招牌諾貝爾物理學獎，其他嗰啲大學講師，連「搞笑諾貝爾獎」都冇份攞，的確係唔值畀呢個價。不過，正如某套港產片所講：「出得嚟行，預咗要還」，所以呢，烏吓烏吓讀咗幾年書，冇溝番個班花校草，呢幾年真係白讀㗎。

網友觀點...X）...

[　無米粥　]

呢啲叫讀又死唔讀又死，等於買隻無咩增長價值的股票，都唔知幾時可以返家鄉。

[　懶人　]

問題係政府刺激唔到經濟，先至咁難搵工！四大支柱，一無是處；六大產業，製造失業！

[　kelvin　]

依家大學生借錢你估為讀書咩，借錢炒股買名牌就有，「天之債仔」個名幾好喎，香港又變債仔港！

[　小肥　]

勁呀，果然大學生識得財務管理，借政府錢要還嘅咩，畢業出來即刻申請破產唔使還，幾咁爽呀！

網址：www.sunsiupak.blogspot.com

阿豪觀點 採取學費浮動制最公道

家陣搵食艱難，有消息話政府研究將學生最長還款期延長去到十三年，但學生必須支付延期利息同風險利率。

不過，學生哥對呢項建議似乎唔多受落喎。鬼咩，就業環境改善唔到，搵埋唔夠養自己，分三十年還都冇用啦。老實講，有頭髮冇人想做癩痢，除咗少數唔生性將學生貸款攞去炒股票嘅之外，大部分人都想早日還清學債，搵唔到食，有咩法子呀？所以計我話，最好辦法係規定學生將來月入嘅若干比例用嚟還債，多有多還，少有少還，踎緊躉嘅當然有拖冇欠啦；當然最公道係採取「學費浮動制」，根據各學科應屆畢業生嘅入息中位數來釐定學費，童叟無欺，一個願打，一個願捱，公道到極啦！

網友觀點...X）...

[　長期糧尾　]

拖長嚟還咪眼冤多幾年，啲利息好似依家咁平就無咩所謂，計你每年八厘息嗰陣就知味道。

[　臭頭　]

大學生江湖救急，要去旅行、買名牌，唔使還啦，香港大把錢！

[　費曼　]

欠債還錢，天經地義啦，使唔使免費畀你哋讀書呀！呢樣嘢都未學識，點學人做社會主人翁？

[　jam紙兒　]

依家樓、股齊鳴，大學生不如攞助學貸款去炒鑊甘，可以仲有數為，輸咗最多咪破產。

網址：www.lukchiho.blogspot.com