叮！鬼唔知阿媽係女人咩！高錕雖然係美籍華人，不過佢中學就讀香港聖若瑟書院。此外，九八年諾貝爾物理學獎得主崔琦，亦都喺香港培正中學接受教育。香港出到呢兩位諾貝爾物理學獎得主，梗係香港嘅驕傲啦。

之但係得把口講驕傲有鬼用咩，咁多年來，政府高官話就話幾咁重視科研，又話創新科技幾咁重要，叮，一時乜乜科技港、一時物物數碼港，講到天花亂墜咁，實際上乜都冇。

查實本地科研投放只有總產值百分之零點八咁大把，遠低於內地嘅百分之一點五同埋台灣嘅百分之二點五，比起美國、日本同南韓等先進地區更加係少得可憐。好心啦，得雞碎咁多經費，學乜人車天車地空談搞科研救港吖。

所以呢，科技大學前校長朱經武在任期間已經谷到成肚氣，經常批評政府忽略科研發展，港大校長徐立之亦站喺同一陣線，一齊發炮批評政府資助經費嚴重不足。

嘥氣啦，兩位重量級校長講到口水都乾埋又有乜用吖，正所謂忠言逆耳吖嘛，呢個賴皮政府一於扮聾當聽唔到。

話時話，香港唔係冇人才㗎，只不過係冇科研土壤之嘛，你睇吓喺咁有限嘅經費之下，仍然經常研究出大把令人拍案叫絕嘅科研產品就知啦。

好似話科大研究生汪滔研發嘅自動導航模型直升機，喺去年四川大地震中協助內地政府拍攝災後影像，評估災區受破壞嘅程度，幾厲害呀！

呢，去年奧運開幕禮出現嘅巨型長城水墨畫夠巴閉啩，原來係科大計算機科學博士朱紹恆研發嘅數碼水墨科技軟件「墨戲」嘅傑作。弊在成班高官唔識寶，畀內地購入使用權，白白將研究成果拱手相讓畀人。

仲有理工大學研發咗性能唔錯嘅電動車My Car，只不過港府遲遲唔肯拉頭纜喺本港大量生產。此外，科大有位教授同台灣合作試驗手機式放映機，後來得到內地企業投資，科大只佔部分股份。朱經武曾經好唔忿氣咁話，如果港府肯幫手，咁就全部股份都係我哋嘅啦。

叮！喺高新科技嘅時代，香港唔可以單靠金融業，發展創新科技產業先至有出路。但科研係細水長流嘅長線投資，以高錕發明嘅光纖技術為例，要喺幾十年後至被廣泛使用。可惜特區政府目光如豆，以為吹水就可以搞科技產業，搞科技產業就可以搵到快錢，試問喺香港搞科研邊度有前途吖？

計太一叮話齋，好彩當日高錕有遠見，走咗去英國做研究，否則香港人連呢個「驕傲」都冇埋。