瑪麗醫院係港島區角色最重嘅公立醫院，年底該院將出現重大人事變動，身兼醫管局港島西醫院聯網總監嘅賴福明醫生，尋日向同事發出電郵透露年底便會退休，據講會返美國「湊」孫，不過，醫管局力邀佢以兼任形式，做醫管局嘅高級顧問（醫療事務），為醫管局參與香港醫院認證先導計劃作準備。
賴醫生喺電郵中話，好唔捨得瑪麗醫院，佢喺間醫院工作咗五年，同時，呢間醫院亦係佢醫科畢業後就入去磨練嘅「少林寺」。至於瑪麗舵手嘅位，有傳聞話好有機會由衞生署借調過去醫管局嘅質素及安全總監梁栢賢坐呢個位，聽聞參唔參與遴選，梁醫生仲係「囉囉攣」。
事關如果梁栢賢轉投瑪麗，就要放棄公務員個金飯碗，加上佢冇乜管理經驗，做咗瑪麗行政總監，轉投瑪麗後分分鐘做埋港島西聯網總監，呢份工作分分鐘吃力不討好，最重要係佢依家喺醫管局角色好重要，連行政總裁蘇利民都唔想佢走，大家不妨睇吓佢點抉擇！