「波子」豪華團由上月二十三日至二十九日，前後共一星期，田少夫婦聯袂歎世界，另外，仲有前富貴黨副主席「莎姐」周梁淑怡及丈夫周明權同埋另外幾對夫婦朋友。一行十一架車浩浩蕩蕩出發，架架「立立令」嘅保時捷一字排開，派頭十足。

田少話，成個旅程好鬆動，每朝七點起身歎早餐，食到九點才開車出發，正午十二點到中途站餐廳食晏，食到兩點再開車，下午五點就返酒店稍作休息，然後享用豐富法國紅酒晚餐，當然午餐冇紅酒飲啦，事關要開車嘛！旅程沿途大部分都係小鎮風情，田少之前話香港地少車多，好難試到跑車性能，今次去到法國就能夠真正感受跑車嘅威力，揸得特別開心！

田少仲話，最過癮嘅係九架車都係香港人，雖然喺異國，佢哋傾得不知幾投契，大家一傾之下，發現唔少人都係睇咗我哋報道先知道有個咁嘅豪華團，紛紛聯絡保時捷車行，結果個個都話冇信錯田少，大讚好好玩。