鬍鬚曾入院一周後，尋日朝早已經閃電復工，晨早七點四十幾分就返到政府總部，開工大吉。鬍鬚曾自言身體狀況良好，仲喺過去嘅禮拜日返咗辦事處準備復工添。佢忽然返工，唔少人都覺得意外，喺佢休假期間署任財爺職位嘅財經事務及庫務局局長陳家強更建議鬍鬚曾將來少啲離境公幹，佢呢個溫馨提示既可以綁住鬍鬚曾留喺香港，自己又可以減少啲署任風險，真係一舉兩得。
鬍鬚曾返工之後，唔少政府高官及同事都向佢送上溫馨問候及溫馨提示，問到陳家強有冇乜嘢保養身體嘅建議時，佢坦言自己冇乜秘方：「點樣健康啲就唔使我教喇，但我建議司長唔好咁多公幹啦！」
今次鬍鬚曾急性心臟病發，搞到要緊急入院做通波仔手術，過程既危險又驚險，事後醫生分析認為佢嘅病情同過去兩周頻密飛往歐美公幹有關，結果身體承受唔到。陳家強呢個建議都算係對症下藥，不過，佢哋兩個係港府財金高官，陳家強嗌鬍鬚曾少啲離岸，雖然夠晒溫馨，但佢自己都可以受惠，事關鬍鬚曾少啲離岸，陳家強就唔使署任咁多財政司司長工作，風險都少啲！