白鴿黨甘乃威被指喺求愛不遂下無理解僱女助理一事，擾攘幾日，女事主至今未公開講過一句話，反而佢嘅前僱主前立法會議員譚香文（Mandy），就成個代言人咁款上電視反駁對方，令呢個立法會選舉敗選嘅前議員曝光率大升，佢愈講愈過火，仲向傳媒證實埋女事主身份，點知女事主不但冇授權Mandy咁做，仲曾經要求佢封嘴，難怪有學者質疑Mandy咁做，等於喺女事主嘅傷口上灑鹽啦。
Mandy近日多次接受電子同文字傳媒訪問，前晚仲喺一個電台節目上，為女事主被傳媒追訪承受嘅壓力而當眾落淚，擔心女事主一時諗唔開。最弊嘅係Mandy被揭漠視咗保護受害人身份嘅原則，以致尋日有報章喺頭版登咗女事主嘅大頭相，網上仲有好多網民對女事主嘅樣貌評頭品足，連佢細個喺邊度讀書、畢業後做過乜嘢工等都被起晒底。
攞前助理嘅心煩事出位，好多人都質疑Mandy有意再戰立法會，佢當然強烈否認，仲誓神劈願話：「我無意選舉……喺港島區（地區直選）。」點都好，佢喺事件中抽水形象就好難搣得甩。