男人之苦種類繁多，好似近期城中熱爆一時嘅白鴿黨甘乃威捲入「求愛」與「好感」事件；財爺鬍鬚曾因為健康問題險死還生等，雖然都係苦，但呢啲苦唔係政府提供援助就搞得掂。

王國興要呻嘅「男人之苦」，係基層男士憂就業、憂生計、憂子女、憂家庭嘅壓力，據佢哋統計，本港每四個人自殺，就有一個係中年男人。中年男人點解咁苦？因為低技術工種好多畀薪酬較低嘅女人代替，而中年男人承受失業與家庭之苦時，連打電話畀乜嘢機構求助都唔知，即使知，打去呢啲機構都好慘，事關家吓好多輔助電話都係女人接聽電話，要一個大男人對住女人呻苦，簡直係另一種男人之苦，因為唔少想尋求協助嘅男人係被配偶虐待，要佢哋對住女人訴苦實在太難。

而且，家吓政府設立諮詢架構時，只有婦女事務委員會，想成立男人事務委員會講出來都畀人笑，所以王國興話成個社會都唔覺得男人需要支援，搞到啲男人好似壓力煲咁，愈來愈苦又唔出得聲，最後一爆了之。

泛民動議交行貨

立法會啱啱復會，王國興就提呢個動議睇怕會引起唔少注意，因迄今為止，議員其他議案都乏善足陳，譬如工聯會潘佩璆嘅加強精神病及康復者嘅支援，就同涂謹申嘅動議相似；泛民議員又照舊以普選、廢除區議會委任制等動議挑戰政改，另外仲有啲貧富懸殊、職業安全等，實在好行貨。