小白觀點:準備清理人形垃圾
中秋節過後,郊野公園燒烤區例牌變垃圾崗,清潔工人執到氣咳,有個後生仔話:「我哋唔將垃圾掟落地你哋邊度有工開!」可見現時通識教育確係唔多掂。佢哋講得出,本身已比垃圾更垃圾,當佢哋仆落地,凡係有些少公德嘅人都記得排隊準備清理呢堆廢物。
不過為咗環保,廢物都可以回收嘅,況且呢啲咁嘅人形垃圾,比已經絕咗種嘅度度鳥更加罕有,內地十.一長假,各大動物園嘅珍禽異獸被暴民嚇死有之,餵到飽死有之,相信好需要補充一下動物。清潔工友將人形垃圾掃地出門,運晒返內地展出,今日廣州遊客用閃光燈閃到佢失明,聽日南京遊客質佢食膠袋啦!
網友觀點......
阿嘉
用膠袋笠住個垃圾人,同垃圾一齊掟落堆田區。
旺旺
無公德,又無口德,叫食環署告佢掉垃圾罪,判佢社會服務令,日日掃街就啱喇!
Chirs Wong
人渣!垃圾不如,咁後生就咁無公德心,所以香港變污糟港,政府要檢討吓公民教育點解咁差。
都是你的錯
梗係拍低,之後擺上網,畀大眾市民知道啲比垃圾更垃圾嘅人嘅樣!
網址:www.sunsiupak.blogspot.com
阿豪觀點:清潔工作長做長有
中秋節過後全港郊野公園慘變垃圾崗,有清潔工人反映,好心叫啲o靚仔將垃圾包好,點知被人窒番轉頭,話「我哋唔將垃圾掟落地,你哋邊度有工開」!嘩,呢班後生仔都算陰毒囉,依家經濟不景,咒人哋冇工開,幾乎衰過殺人全家呀!
但計我話,就算「米飯班主論」成立都冇用。大家有冇留意一段新聞,話有個債仔被收數佬上門追數,一怒之下揮刀怒斬之,結果兩敗俱傷一齊送院治理。嗰個債仔當初係咪應該同追數佬講:「我哋全部自動自覺準時還款,你哋邊度有工開?」
不過,清潔工人可以定,因為年年中秋都有呢班「垃圾青年」出嚟搞搞震,你哋份工實長做長有!
網友觀點......
卜勤
班青年係咁㗎喇,一人罰一千五百蚊:唔畀錢,邊有人掃街!
朱少
咁佢哋都係講事實啫,天下無賊,警察何用?
Patrick Lai
叫嗰班o靚仔自己做番一日清潔工人,睇吓佢哋係咪仲咁口響囉!
禮義廉
其實已經有進步啦,起碼淨係駁嘴,而唔係好似幾年前個o靚仔咁摑差人講「happy new year」!
網址:www.lukchiho.blogspot.com