遠嘅唔講，單係去年嘅增聘副局長、減外傭稅、增加生果金甚至泰國包機，有邊一劑唔係搞到一鑊泡？有邊一劑唔係令到民怨沸騰？政府施政亂七八糟，弊在連推動立法嘅表現一樣係好唔掂。

新力量網絡日前發表《立法會議決分析報告》，指出港府過去四年諗住避吓風頭火勢，多次大量擱置、收回或押後具爭議性法案換取表面嘅行政立法和諧，例如公平競爭法及停車熄匙等法案，結果搞到立法成功率大插水。

事實上，港府近幾年每年提交立法會嘅法案獲通過比率一直都徘徊喺唔合格嘅邊緣，約莫得五成左右。原來低處未算低，去年原本諗住有二十七條法案可以闖關，但被擱置、收回以及押後咗十條，另外十條被否決，只係得七條成事。

叮佢個鎯鎯，立法成功率得嗰兩成半，撞大板唔止難睇，而且令到一啲十萬火急要處理嘅重要政策一拖再拖，對香港社會嘅長遠發展造成非常負面嘅影響。

好明顯，立法成功率低成咁，完全反映成個問責團隊嘅政治判斷出咗問題，以為求其掟個甩皮甩骨嘅法案出嚟就可以蒙混過關，叮！邊有咁易呀！莫講話議員打回頭，法案千瘡百孔，市民都唔收貨啦！好心成班懶官做嘢唔好咁因循苟且，做好自己份工得唔得？

香港城市大學專業進修學院學術統籌宋立功講得啱，政府立法成功率低落，反映曾蔭權政府步入管治黃昏期，如果年底由佢拉頭纜嘅抗毒運動又唔掂嘅話，跛腳鴨政府施政勢將舉步維艱，政治形勢更唔樂觀。

計太一叮話齋，呢個何止係跛腳鴨政府，做乜都進退失據，簡直係冇腳鴨政府就真。睇吓港台近年醜聞多多，政府本來諗住整頓一下港台，但船頭驚鬼船尾驚賊，經過三年研究又研究、諮詢再諮詢，叮！居然話原地踏步維持港台現狀，你話係咪畀佢激到啤一聲吖？

特區政府嘅當務之急，本來係要提高施政水平，令政策制訂以及執行嘅過程順暢。但冇計啦，鬼叫呢個係「特衰政府」咩，正所謂弱勢政府百事哀吖嘛，連自己下屬都管唔掂，一個二個籠裏雞作反，你話政府嘅威信仲唔衰到貼晒地咩！

唔好話太一叮唔單聲，政府唔好以為做隻縮頭烏龜，將爭議性嘅問題押後，民怨就會因此而散呀。民怨呢家嘢好難散，仲會不斷累積，谷谷埋埋一下爆出嚟，叮，收唔到科嗰時，咁就弊弊都冇咁弊咯。