小白觀點:停派飛機餐空姐執包袱
有日當你上機扣好安全帶坐定定嘅時候,聽到機上廣播「歡迎各位搭乘本公司航班,乘客務必確定上機已放低幾両」,千祈唔好大驚小怪,因為某日本航空公司認真有環保觸覺,佢哋認為如果乘客喺機艙屙少啲,飛機負重輕啲,飛得輕鬆啲,燃料用少啲,二氧化碳排放量少啲,地球先生條命仔可以吊耐啲喎。
唔好話小白老弟危言聳聽呀,如果單單為咗減磅而出到呢招,難保日後會有進一步嘅措施——到時機師減到得番一丁友;乘客要自己帶埋摺櫈上機;飛機餐?當然唔使旨意啦,因為食得多自然屙得多;由於冇咗飛機餐,空姐變得可有可冇,求其由乘客抽籤選行長就算啦。
網友觀點...X)...
[ stanley ]
好似有啲道理,但應該唔work囉,上機咪又食飛機餐,食完要屙,好難忍喎。
[ cherry ]
如果咁做可以救到地球,我都會做嘅,但得一間航空公司係咁,邊有用㗎!
[ 多多 ]
如果上機前放低幾両可以慳燃料,咁燃油附加費係咪可以唔畀或減價先?
[ 華健 ]
短程機都話可以吖,長途機一定唔得啦,咁即係唔救得幾多,嘥氣!
網址:www.sunsiupak.blogspot.com
阿豪觀點:大條道理收肥人附加費
講到屎屎尿尿,大家唔好即刻皺埋眉頭,原來同環保大業息息相關㗎。最近有航空公司呼籲旅客上機前先「放低幾両」,等機身輕啲,排放少啲二氧化碳喎。
咦,咪住先,咁簡單就救到地球?有冇咁筍呀?啊,我明喇,如果乘客以後都自動自覺喺上機前「放低幾両」,並且被大家讚賞有環保意識嘅話,咁即係話「體重愈輕愈環保」呢個理論成立啦,咁以後航空公司係咪可以大條道理向肥人徵收附加費?發展落去,可能會要求乘客上機之前先磅吓重,然後按照比例收唔同價錢嘅機票喎!
發展到呢個地步,以後恐怕只有呃秤最叻嘅香港燒臘店老闆至有機會買到平價機票矣!
網友觀點...X)...
[ Patrick Lai ]
咦,呢樣嘢堅喎,放低幾両,我唔止識,仲幾拿手添,咁我咪都係環保先鋒?
[ 尖子 ]
咁不如推廣埋叫啲乘客上機前,唔好食嘢一日,咁體重應該會更加輕呀!
[ 牙擦蘇 ]
唓!唔好話我話,呢啲其實咪又係航空公司專登搞出嚟嘅噱頭嘢……
[ Rock Bank ]
應該打晒啲飛機落嚟,大家都唔准搭,咁就冇咁多二氧化碳排放嘞!
網址:www.lukchiho.blogspot.com