今個禮拜五立法會內務委員會召開會議，而Miriam劉健儀主持埋最後呢次會議就完成任期，直至本月中新立法年度開波，宣讀施政報告後，內會又要重新選過正、副主席嘞！
咁Miriam會唔會冧莊呢？佢話冇聽聞有人會加入戰圈，之不過，若果有人爭都係好事，事關有競爭嘛！佢仲話若果啲同僚認同佢呢幾年工作表現嘅話，佢好樂意繼續做落去。
老實講，到依家為止都冇風聲話有人要出嚟同佢爭，睇怕佢都係無風無浪連任主席㗎喇！數數手指，佢已經五度冧莊，若果再當選就係第六度冧莊、第七度做主席，咁有冇七年之癢先？佢諗都唔諗就話冇，仲話內會主席做咗七年啫，做議員做咗二十一年添，每日都有新鮮事同挑戰，不知做得幾過癮。
咁點睇佢拍檔白鴿黨嘅「肥仔明」李華明呢？有冇機會繼續冧莊做「內副」呢？即係內會副主席呀。
Miriam就話同肥仔明拍檔咗幾年，大家有眼睇佢哋做成點，而過往同肥仔明都好合拍，若果肥仔明想繼續做內副嘅話，佢都會支持喎！