06/10/2009

播放本新聞相關短片

政情:五散人集中火力振聲威

外號「五散人」嘅五名獨立功能組別議員尋日開會討論未來路向時,好多人都對被政府輕視單嘢耿耿於懷,今後會要求煲呔曾同各司局長一視同仁,多啲同佢哋一齊獨立會面;若政府堅持要分開見,藉此將佢哋逐個擊破,佢哋唔排除會好似上次見煲呔曾咁集體杯葛唔見,睇吓政府夠唔夠膽放棄晒佢哋嗰五票。

其實佢哋都睇到喺立法會內單打獨鬥,有時好蝕底,對於幫佢哋各自嘅業界爭取權益亦係弊多於利。所以佢哋會喺嚟緊一年,針對個別對佢哋有共同興趣或對某個業界利益攸關嘅議題加強合作,盡量達成一致投票立場,必要時仲會學泛民主派同傳統左派咁玩「冧友」,透過五把聲音同五粒投票按鈕,聲援個別「散友」。

嚟緊第一炮就係中產同基層都相當關注嘅最低工資立法,佢哋五個人都係有關法案委員會嘅成員,相信可以扮演中立關鍵少數嘅角色,喺工商界大老闆同基層打工仔之間作出平衡。