保安局局長李少光尋日榮升爺爺，佢囝囝李霖恩嘅太太朝早九點二十九分喺醫院剖腹產女，BB女成七磅重，母女平安。李霖恩話尋日爸爸喺食晏時間已趕咗去醫院見吓個孫女，見到BB嗰刻非常感動，不自覺扮吓鬼臉氹吓孫女，表情成個細路仔咁，當堂冇咗喺保安局掌權嗰種氣勢。
李霖恩幫囡囡改咗個英文名叫Gianna，係「神賜的禮物」嘅意思，但中文名就留番畀爺爺親自操刀喎！李少光透露已諗定幾個好名畀孫女，但依家仲未揀定用邊個。尋日李少光收工，仲親自接埋榮升太嫲嘅李媽媽去醫院探小Gianna，四代同堂，真係好幸福。
我哋搵咗堪輿學家麥玲玲幫Gianna呢個小牛女算過命，麥師傅話小Gianna天生有運行，由二十一歲就會行大運行到六十歲。另外，麥師傅計出Gianna命格屬水，有七剎星當旺，天生有運動天分、紀律性強，仲非常有領導才能，可以去外國留學，大個咗仲好大機會喺政治方面發展添。咁睇嚟，小Gianna分分鐘可以繼承爺爺嘅衣鉢喎。