早前因急性心臟病入院通波仔嘅財爺鬍鬚曾，講明今日正式返工，但佢可能要證明畀大家睇佢心理同生理上真係好番晒，尋日十一點已返到辦公室，仲逗留咗七粒鐘，午飯時間只係捱飯盒。
佢嘅新聞秘書對我哋話，佢並唔係正式返工，只係返去睇吓文件，冇做任何政策決定；但有電台引述佢嘅發言人話，鬍鬚曾尋日係返去處理緊急事務。究竟邊個版本至係真呢？
鬍鬚曾突然心臟病發入院後，外間有人質疑佢嘅工作能力，可能成為日後競逐特首嘅障礙。雖然鬍鬚曾唔及其他兩個疑似特首候選人咁高調，但點都要做啲嘢證明自己仲有議價能力，之前佢未出院已叫秘書帶文件畀佢睇，正式返工前嘅尋日就喺政府總部現身。
今日佢正式返工，朝早仲會出席行政會議，睇嚟病發時血壓曾經低到量唔到嘅佢，返工前應該先量一量血壓好喎！