好似立法會旅遊界代表謝偉俊喺會上話將來由特首委任、負責向廣播處處長畀意見嘅顧問委員會，比起前排喺北京舉行嘅建國六十周年慶典上特區政府架巡遊花車，更適合以「紙紮」嚟形容，事關呢個顧問委員會冇實權，只係一個諮詢組織，根本唔可以改善到港台一直為人詬病嘅問題。須知道「紙紮」本來唔係一個潮語，但依家特區政府接連畀人彈為「紙紮」，可能「紙紮」嘢陸續有嚟！

放大圖片

放大圖片

之前外界質疑呢個顧問委員會係港台頭上嘅一把刀，經政府多番解畫後，有人又批評為冇牙老虎，依家仲弊，竟然係紙紮老虎添！

劉吳惠蘭無言以對

除「紙紮」外，有議員話今鋪港台獲得政府放水搞數碼化、高清化，又得到政務司司長同港台簽約章，完全可以用「升呢」嚟形容，所以尋日出台嘅諮詢文件，應該話係一份政策文件至真！「升呢」呢個潮語係乜嘢意思，相信唔使多解釋，大家都會明白啦！

之後有議員又話雖然今次港台「升呢」，但係當局嘅廣播政策仍然係「超低能」，事關港台一日仲係政府部門，公共廣播問題仍然係冇解決到，故此今趟政府以為解決咗問題嘅想法，實情係「超低能」嘅。

聽到議員連珠炮發嘅潮語，坐喺官員席上嘅商務及經濟發展局局長Rita劉吳惠蘭一直無言以對，只係間中飲水潤喉，反而坐喺旁邊嘅商經局外籍秘書長栢志高就報以一笑，唔通佢都識聽？

其實Rita不妨以「堅講」嚟回應「紙紮」、用「勁搞笑」嚟反駁「超低能」，唔單止可以乘勢推動六大產業之一嘅創意文化，甚至有助改善行政立法關係添！