太一叮思疑，特區衙門啲財金高官唔係患咗妄想症，就係發緊白日夢。你睇吓啲裁員巨浪一浪浪咁冚埋嚟，打到啲打工仔心慌慌、腳震震，而啲高官仲喺度自得其樂，呢頭有鬍鬚曾話已經喺隧道盡頭見到曙光，嗰頭又有人稱傻強嘅財經事務及庫務局局長陳家強大力唱和，話金融海嘯已經完結。佢哋又話喎，因為經濟已經逐步回穩，所以新一年度嘅施政報告唔會繼續派糖。

嗱，啲高官就話見到曙光啫，唔知商界又點睇呢？就攞國泰個畸屎嚟講，你知我知，航空業不嬲係實體經濟嘅溫度計，經濟好時，啲出入口貨量發發聲咁升，啲公司職員飛嚟飛去做唔停，航空公司自然豬籠入水，反過嚟講，家陣國泰咁大動作，明顯唔睇好個經濟前景。至於啲高官口中嘅曙光？對唔住，係見唔到嘅。

商界見唔到曙光，唔知小市民又見唔見到呢？咁講啦，雖然股市樓市升完又升，但係本地失業率依然高企百分之五點四，全港收入低過綜援嘅在職貧窮家庭超過十九萬戶，另外仲有十六萬七千幾戶無業家庭。有單親媽媽每日做足十幾個鐘，放工仲要專程撲去深水埗買平飯盒，夜晚十點幾先返到屋企同仔仔齊食冷飯，至於你問佢見唔見到曙光？佢會答你：「可以話係無明天。」

更離譜嘅係，見到啲窮人多成咁，特衰政府不但唔去扶貧紓困，反而帶頭製造貧困，佢哋縱容啲外判公司剝削員工，每次續約，啲員工嘅人工就少梗一截。近日又有工會接到投訴，話水務署負責資料輸入嘅外判合約今年七月轉換承辦商，新合約訂明臨時文書助理月薪只有四千九百五十蚊，較原本嘅六千蚊大幅減少超過一成七。同一個職位，同樣嘅職務，外判工同公僕嘅人工竟然有天淵之別，一個特衰政府，可以話係香港貧富懸殊惡化嘅縮影。

商界見唔到，市民見唔到，偏偏淨係啲高官見到經濟曙光。太一叮發現，啲高官自說自話，明顯係患咗妄想症，而病因主要有兩個，一就係不知民間疾苦，二就係懶得振興經濟。

傻強呀傻強，家陣鬍鬚曾心臟病發入院，你老兄傻吓傻吓都傻成署任財爺喎。太一叮奉勸你一句，咪再匿喺冷氣房度沾沾自喜發噏風啦，快啲出去睇吓啲小市民嘅苦況，跟手諗諗辦法，再咁落去，官逼民反都有之呀，叮！