24小時瀏覽記錄

政情：甘威爆燒臘檔行規

本文重點

海關揭發有九間燒臘店涉嫌「呃秤」，最多呃秤達三成八，市民反應強烈，立法會議員甘乃威爸爸生前開燒臘店，佢尋日喺電台節目上大談呃秤，話賣燒肉搭豬骨係行內老規矩，事關一隻豬約三十斤，豬頭肉、豬腳、豬手同肥豬肉佔三至四斤重，冇乜人會買，所以一斤燒肉通常會搭兩至三両豬頭骨落去搭夠數。

又好似賣燒鵝咁，舖頭實會搭個頭同條頸落去，同搭豬骨做法一樣，甘威仲話今次海關大檢舉後，相信燒臘店要改變傳統搭豬骨嘅做法，鑑於豬肉成本不斷上漲，估計消費者要適應燒肉貴咗唔少嘅情況！

佢之後話其父當年童叟無欺，如果客人指明唔要骨，唔會用肥豬肉搭夠。

佢讀中學時，每逢放假就會落舖頭幫手斬燒肉同叉燒，但爸爸一定唔畀佢用秤砣，事關擔心佢掌握得唔好喎。