財爺鬍鬚曾心臟大件事入院，搞到名人圈都有「心慌症」，近排去親酒會會場都聽到有人「講心」，好似建造界喺紅磡舉行十．一酒會，大家碰頭都係「講心」多，雖然政府同醫療界嘅宣傳都只係叫人一年驗身一次，但建造界嘅立法會代表「大舊石」石禮謙就誇張到每三個月就一次驗血，直頭係心慌慌人版，睇嚟佢唔怕煩、最怕病。
大舊石話，自己為食又係大胃王，美食不離口，雖然家吓未有高血壓徵狀，但肥肚腩現晒形，惟有自己警覺啲，食少啲油膩嘢，每三個月就搵醫生檢查一次，有乜問題都可以及早發現嘛。
一直身材甚Fit嘅梁振英就話，佢每日都有運動，喺屋企都經常游水同耕種，好似上禮拜日就花咗半天播種，運動量十足。多年前接受過「通波仔」手術嘅夏佳理就話，心臟出過問題就要盡量戒口，高脂肪同高膽固醇嘅食品就免喇！
立法會另一個「重量級」議員黃定光，十年前都驗出心臟跳得異常緩慢，但佢似乎唔多擔心身體，仲講笑咁話：「我唔怕心臟病，只驚荷包乾硬化，即係冇水。」