唐唐呢句叫公務員做好啲、佢就易做啲嘅說話一出，有份出席同一場合嘅前保安局局長葉劉淑儀就好不滿，批評呢句話有卸責成分。葉劉話，唐唐作為政務司司長，職責就係處理棘手問題，扮演協調同統籌角色，當其他部門阿頭揸唔到主意，佢就應該表現得果斷啲，企出來主持大局，而唔係將個波踢畀下屬。講到呢度，葉劉仍然意猶未盡，暗寸唐唐要帶頭做個好榜樣，而唔係一味叫班公務員做好啲。