30/09/2009

播放本新聞相關短片

政情:葉劉寸唐唐做壞榜樣

疑似特首競選人同公務員嘅關係好唔好備受關注,尋日政府搞咗個優質服務獎勵計劃,署理行政長官唐英年擔任頒獎嘉賓,佢致辭時,大講點樣先係優秀嘅公務員,話凡事要從市民角度諗吓,需要時要行多一步,尤其當涉及跨部門工作時,部門之間要多啲協調同溝通,可以令佢嘅工作更容易。

唐唐呢句叫公務員做好啲、佢就易做啲嘅說話一出,有份出席同一場合嘅前保安局局長葉劉淑儀就好不滿,批評呢句話有卸責成分。葉劉話,唐唐作為政務司司長,職責就係處理棘手問題,扮演協調同統籌角色,當其他部門阿頭揸唔到主意,佢就應該表現得果斷啲,企出來主持大局,而唔係將個波踢畀下屬。講到呢度,葉劉仍然意猶未盡,暗寸唐唐要帶頭做個好榜樣,而唔係一味叫班公務員做好啲。