赴京政協中，「阿姐」汪明荃以格仔造型示人，拖住個LV旅行篋素顏上機；靚太方黃吉雯着件綠色上衣配黑色中褸西褲；嫻姐陳婉嫻就帶定防曬霜、牛仔褲同平底鞋；帶定大褸嘅何志平就有老婆胡慧中送機。政協辦公廳、中央統戰部、僑辦、港澳辦同台辦尋晚即刻聯合設宴款待，出席人士有逾四千人。

港府尋晚都公布港區觀禮團名單，綜合咁多團體嘅邀請，本港政商界好多父子兵都去咗北京，好似嘉華國際嘅呂志和同呂耀東父子、合和胡應湘同胡文新、劉皇發同劉業強、福建幫施子清同施榮忻；甚至有一家三口上陣，好似「領呔大王」曾憲梓同囝囝智雄、智明，霍英東家族嘅震霆、震寰同第三代嘅啟剛等。行政、立法機關中，三十四名建制派議員同三司十二局，基本係空群出動嘅格局。