個公證會訂咗今日朝早九點鐘開始，截至尋日為止，一共有嚟自十四個關注團體嘅二十多名代表，向立法會秘書處報咗名出席公證會，立法會方面都好重視，由兩個事務委員會合併召開聯席會議，可惜會期撞正北京有盛事，十．一閱兵觀禮團咁啱訂咗今朝八點半嘅飛機上京，當中包括三十多名立法會議員。衞生同福利事務委員會合共有二十五名委員，其中九名建制派議員同泛民主派嘅李國麟同馮檢基都有份上京。

一個議員對兩個團體代表

扣除上京嘅人，兩個委員會夾埋只得十三個委員喺香港，如果今朝有人瞓過龍或者撞啱塞車遲到，隨時會湊唔夠八名法定開會人數，流會都似；即使避過流會，今日嘅議事堂都只得十個八個議員對二十幾名團體代表。議員喺有精神病患者涉及兇案後表現得好着緊，家吓遇到北京有盛事，就個個現晒形。

我哋就事件問過身兼衞生事務委員會主席嘅李國麟，佢自爆喺幾日前至收到上京邀請，已即時致電秘書處問吓夠唔夠人開會，肯定夠人後先答應成行。問佢咁做會唔會令啲團體覺得不受尊重，佢話相信其他冇得上京嘅泛民議員，一定會幫手跟進團體嘅訴求喎。咁講法不如斷鐘計番份糧畀班留喺香港嘅議員啦！