小白觀點：吸走有害物質全賴有你

香港人真係多事幹，成日鬧空氣點差點污濁，過馬路又要捂住個鼻，喂，有冇諗過日日喺街頭擺檔嘅報販感受呀？唔係佢哋日日做「人肉吸塵機」，吸走有害物質，空氣嘅二氧化氮同可吸入懸浮粒子濃度，過去兩年點止超標兩成同四成咁少呀？

其實，環境局局長邱騰華擺到明解決唔到空氣污染問題，你知啦，佢成日出嚟做環保騷，假假哋都算係半個娛樂圈嘅人，梗要浮誇啲啦！嗱，旺角、銅鑼灣呢啲心臟地帶，污染指數周不時都會高達一百四十，問題係呢個數據唔夠形象化，亦即係冇noise呀，以後佢出嚟公布「今日有一百四十個報販頂唔順瞓低咗！」係咪touching兼有impact好多呢？

網友觀點...X）...

[　Ken　]

空氣污染指數高到爆燈，政府口口聲聲講環保，又話咩藍天行動，做過啲乜吖？依家個天仲係灰嘅，市民日日吸廢氣。

[　威　叔　]

報販真係幾慘㗎，檔口一定喺馬路邊先有生意，但就要搵命博，吸到肺積塵，搵埋都唔夠睇醫生，政府真係要重視吓。

[　黃　生　]

政府做番啲實際嘢啦，咩環保電車，講就好聽，邊有人用吖咁屎，配套又少，搵笨。

[　萍　姐　]

賣報紙嘅邊會上舖開冷氣吖，如果係咁搵埋都唔夠畀舖租，惟有頂硬上食塵囉。

網址：www.sunsiupak.blogspot.com

阿豪觀點：拍硬檔幫環保署慳番筆

近日福建省上杭有大批兒童鉛中毒，當地官員解畫，話兒童鉛中毒係因為食得爆谷多，堪稱醫學界嘅一項重大發現。

好彩喺「重大發現」呢方面，我哋香港都唔執輸。最近有環保團體發現，繁忙街道旁嘅報販，除咗賣報紙同雜誌外，仲有一項重要功能，就係做「人肉吸塵機」嘞。其實計我話，如果想知香港空氣質素有幾差，與其靠環保署公布嘅一堆冷冰冰數據，倒不如落街買份報紙，如果你發現個報販係咁氣促、呼吸困難，咁就唔使問，空氣質素好極有限。所以除咗應該開發報販嘅吸塵機功能，仲應該進一步搵佢哋做埋「人肉路邊監測站」啦，咁樣環保署就可以慳番購置器材嘅錢啦！

網友觀點...X）...

[　匿　名　]

所有戶外工作嘅人，都係路邊空氣監測站，如人飲水。

[　尖　子　]

嘩！唔係呀？仲搵命博落街買報紙測試吓空氣污染？以香港咁嘅空氣質素，梗係免得過都唔出街啦！

[　working class hero　]

巴士噴黑煙真係罪無可恕，咁大間公司，每年賺咁多錢，唔係搞好啲車嘅錢都冇呀嘛？

[　little sheep　]

大佬呀，連長跑運動員都頂唔順香港啲污濁空氣而猝死啦，啲報販日捱夜捱都冇事，直頭可以參加奧運會啦！

網址：www.lukchiho.blogspot.com

發表方法

讀者如對本欄每日話題有任何意見，歡迎登入網址發表意見。本報保留採用刊登權利，不另通知，敬請留意。