聽聞呢隻怪獸橫行霸道，貪得無厭，唔使幾年時間，已經食到腦滿腸肥，由一隻小怪獸變成巨獸，繼續喺度魚肉百姓打橫行。大家唔好諗住可以避之則吉，因為呢隻怪獸就係臭名昭著嘅「領匯」，自從接手管理大部分屋邨嘅商場以及停車場之後，已經同好多小市民嘅日常生活息息相關，想避都冇得避呀。

尋日就有立法會議員狂數領匯嘅罪狀，好似一匹布咁長，數極都數唔完。要數最離譜嘅，當然就係瘋狂加租，領匯唔單止將一般小商戶趕盡殺絕，就連屋邨醫生都畀佢逼到埋牆角。

公共屋邨執業西醫協會尋日召開記者會，炮轟領匯無良，要屋邨醫生搬去走廊盡頭嘅死位。唔好以為咁山旮旯嘅位會平啲喎，租金不降反升，有屋邨商場診所，由原本月租一萬元，一加就加到三萬，加幅兩倍呀！叮！咁加法，即係叫人唔使做生意啫！

咁都不特止喎，領匯獅子開大口要屋邨醫生自己出錢裝修診所，粉飾太平。叮，羊毛出自羊身上，最終受害嘅咪又係病人，遲早要畀多啲診金囉。

冇辦法，領匯一向錢字行頭，為咗牟取暴利，已經無所不用其極。領匯負面新聞幾乎無日無之，轄下停車場收費加完又加，但服務竟然衰過舊時。領匯仲自把自為，喺未經諮詢下，擅自將轄下多個商場酒樓改建為老人院舍，完全冇理會附近居民嘅需要。

呢嗱，領匯同房屋委員會要攤分九十一個公屋公共地方嘅管理費，過去三年半以嚟，領匯經常拖數，一度涉款超過八百萬元，直至畀人踢爆至捨得還清款項。 領匯行政總裁羅爾仁解釋，領匯要每月發出九十一張支票畀各屋邨嘅物業管理承辦商，屋邨公共地方財務報表又未搞掂，未能確定戶口嘅盈餘，所以至遲咗繳費。

老實講吖，領匯去年勁賺十八億元，點會連區區幾百萬元嘅費用都拖得就拖呢？其實分明就當政府係冇牙老虎，咬佢唔入就真！

鬼咩，房委會對領匯法外開恩，明明公契上有罰息條款，一直發雞盲冇執行，到底有乜解釋呢？署理房屋署署長李麗儀話喎，冇錯公契有追收利息條款，但由於問題較複雜，所以喺領匯上市之初協議暫時唔執行。

叮佢個鎯鎯，原來行政立立亂就可以拖數？原來問題複雜可以唔使罰？真係唔講唔知喎。不過太一叮奉勸一句，各位公屋居民千祈唔好有樣學樣，話因為公司有九十幾樣嘢做，唔記得交租呀，因住畀人封屋踢走呀。

又難怪領匯咁跋扈喎，講到尾，如果唔係政府當年為咗卸低包袱，又點會造咗呢隻怪獸出嚟，話晒都叫做「親娘」，邊捨得郁手打佢吖。不過領匯呢隻怪獸見人就咬，又未免太過勢兇夾狼喎。

怪獸，怪獸，過嚟吖，過嚟吖，等太一叮綁番個鎯鎯，唔好再四出作惡多端啦，再係咁曳就要叮爆佢！