小白觀點：熱血仔吃力不討好

海洋公園哈囉喂演員畀人投訴一身汗臭，冇計啦，家陣嘅天氣反常，秋老虎惡死騰騰，熱到阿媽都唔認得，有環保團體發現上個月嘅家居用電量，用咗超過十四億度電呀！不過呢班年輕人咁落力表演，搞到身水身汗，竟然仲畀人話「臭鬼」，吃力不討好，真係可憐。

記得之前荔園都有鬼屋，唔使扮假鬼嚇人，遊客坐住架小火車高速撞大鐵門，雙手伸出啲都隨時撞斷，恐怖過裏面啲爛鬼蠟像多多聲啦！鬼屋出面都唔好得幾多，大象天奴晚年甩皮甩骨，咪又係一身惡臭，仲經常有氣無力咁伸出象鼻，向冇買香蕉畀佢食嘅遊客噴鼻涕，論驚嚇度，海洋公園哈囉喂要行埋一邊！

網址：www.sunsiupak.blogspot.com

阿豪觀點：為「鬼」出番啖氣

哈囉喂「臭鬼」呢單新聞可以話嚟得絕對合時，聯合國啱啱舉行完氣候變化峰會，連秘書長潘基文都話依家談判進展太慢。千祈咪以為氣候變化呢味嘢唔關你同我事，大家試諗吓，往時九月、十月，天口已經開始涼涼哋，歌仔都有得唱：「秋來也秋去，千千片紅葉跌墜」，依家？睇怕大家除咗「秋官效應」之外，都冇乜機會接觸個「秋」字囉！

「臭鬼」喺哈囉喂前出現，正好幫大家糾正態度—大家咪以為「鬼」好恰呀，以前搞親嘩鬼show，都發生啲客人「打鬼」事件，甚至有「女鬼」聲稱被男遊客掃背脊騷擾，依家「臭鬼」出馬，即刻嚇番班友仔轉頭，直頭係出鬼番啖氣呀！

網址：www.lukchiho.blogspot.com

網友觀點......

Vicky

我睇見佢哋都熱，着住套咁嘅衫企足起碼五個鐘，唔臭有鬼啦！辛苦錢真係唔易搵。

超力仔

我哋畀錢去玩，行入去個密室聞到臭汗味，真係冇晒癮㗎喎，叫海洋公園開勁啲冷氣啦！

Suki

哈哈哈，臭鬼好搞鬼，點臭都唔除得面具，都幾慘。

Tara

不如海洋公園畀班臭鬼員工隔兩個鐘沖一次涼啦，咁咪冇咁臭囉。

安仔

你哋唔知海洋公園用意，喪屍梗係有屍臭味啦，唔識嘢，不知幾真實。

阿建

海洋公園連照顧「國寶」中華鱘都吔吔烏，想佢哋照顧好啲廉價勞工？咪玩啦！

黎記

哈囉喂扮鬼啲人，同迪迪園扮卡通人物嗰啲人一樣咁慘，遊客都係將自己嘅快樂建築喺別人身上。

Patrick Lai

唔怪得晒海洋公園，呢件事都反映出全球氣候暖化係幾咁嚴重，如果唔係點會十月都仲咁熱呀？