醫管局同衞生署早前多次爆出醫療事故，而好多個案都係由傳媒或受害人主動揭發，令人質疑當局有意隱瞞錯失。食物及衞生局局長周一鑊早前就高調宣布會改善有關嘅通報機制，希望可以增加透明度。言猶在耳，佢又重蹈覆轍。
署理行政長官唐唐尋日探完鬍鬚曾後，特別喺醫院現場搞咗個記者會，仲拉埋周一鑊、醫管局行政總裁蘇利民同幫鬍鬚曾做通波仔手術嘅資深心臟內科醫生李偉聯做布景板，原意係想話畀市民同市場人士聽，鬍鬚曾好快就可以康復出院，整個政府同香港嘅金融監管制度運作正常，避免有人作出不必要嘅揣測。
點知李醫生講解鬍鬚曾嘅病情時講到一舊舊，佢話鬍鬚曾係患咗「急性心臟病」，入院時「情況比較緊張」，又話「如果」鬍鬚曾嘅康復進度保持到，就「應該」可以完全康復。記者問鬍鬚曾入院時有冇生命危險，佢欲言又止咁淨係答「有危險」，令人產生無限聯想。
當記者要求李醫生進一步解釋點樣危險法時，周一鑊就好冇禮貌咁喺側邊插嘴打斷李醫生嘅講話，話「唔好講咁多嘢喇，李醫生要趕番去做嘢」，之後草草結束咗個記者會同打發李醫生離開。周一鑊咁做法，似乎係剝削市民嘅知情權，反而令外界對鬍鬚曾嘅病情多咗疑問。